«Cine y salud» premia «El rap que desconecta» e «IA y síndrome de Rett: Una historia de esperanza»

O IES Maximino Romero de Lema de Baio foi distinguido no XXIII Certame de Curtametraxes Cine y Salud 2025 polo seu proxecto audiovisual «El Rap que desconecta».

Este certame, celebrado os días 4 e 5 de abril no Patio de la Infanta de Ibercaja en Zaragoza, ten como obxectivo promover a reflexión sobre a saúde a través do cine, involucrando centros educativos, sanitarios e entidades sociais.

O conselleiro de Sanidade do Goberno de Aragón, José Luis Bancalero Flores, destacou na clausura do evento que esta iniciativa «fomenta o traballo en equipo e pon en práctica a creatividade e o respecto mutuo, valores necesarios para o crecemento como persoas».

O certame deste ano recibiu un total de 92 curtametraxes, das cales 31 foron seleccionadas para a fase final. A participación do IES Maximino Romero de Lema con «El Rap que desconecta» subliña o compromiso do centro coa promoción da saúde e a inclusión a través de proxectos educativos innovadores.

Nesta curta participa o alumnado de ciclo medio de Sistemas Microinformáticos e redes: Manuel Campos, Jorge Oreiro, María Amado e Naiara Vázquez coordinados polos docentes Fina Paulos e Óscar Rey.

Por outro lado, tamén foi galardoado co voto popular a curta “IA y síndrome de Rett: Una historia de esperanza” dirixida polos docentes Óscar Rey e Fina Paulos, do Departamento de Informática, que conta a historia de Daniela Novo Garrido.

O IES Maximino Romero de Lema continúa consolidándose como un referente en innovación educativa, promovendo valores de igualdade, inclusión e saúde a través de proxectos creativos que involucran activamente ao seu alumnado e profesorado.